En portada

Delimítase o territorio da candidatura da Ribeira Sacra a Patrimonio da Humanidade

O mapa proposto inclúe un total de trece concellos, dos cales cinco son ourensáns
Detalle do campanario dunha das igrexas da Ribeira Sacra./ Foto: Carlos G. Hervella.
Detalle do campanario dunha das igrexas da Ribeira Sacra./ Foto: Carlos G. Hervella.

A delimitación territorial da candidatura de Patrimonio da Humanidade presentada polo Valedor do Pobo era un dos asuntos abordados na sesión plenaria que o Consorcio de Turismo da Ribeira Sacra celebraba o 1 de outubro en Nogueira de Ramuín. “Esta proposta forma parte dun estudo coordinado dende o Valedor do Pobo, realizado por unha equipa de traballo das universidades galegas e financiado polas Deputacións Provinciais de Lugo e Ourense”, segundo se informa dende esta entidade, que preside Luis Fernández, alcalde de Sober.

Esta proposta inclúe trece concellos, dos que oito son da provincia de Lugo. Trátase de O Saviñao, Monforte de Lemos, Pantón, Sober, Chantada, A Pobra do Brollón, Carballedo e Ribas de Sil. Os cinco restantes son ourensáns: Castro Caldelas, A Teixeira, Nogueira de Ramuín, A Peroxa e Parada de Sil.

“Queremos recalcar que tan só é un borrador e que en ningún caso é algo invariable. Haberá unha proposta final que se dará a coñecer cando os traballos estean máis avanzados; levarán consigo un período de alegacións que a día de hoxe non existe por non ser unha proposta oficial”, tal e como se indica dende o Consorcio de Turismo da Ribeira Sacra.

Esta proposta de mapa xa se lle envíou aos 21 concellos, ao Consello Regulador da Denominación de Orixe Ribeira Sacra e á Asociación Ribeira Sacra Rural, todos membros do Consorcio. “O formato no que se lles fixo chegar coa convocatoria de pleno foi un DVD pola resolución e formato do propio plano que non posibilita enviarse por correo electrónico”, matízase dende esta entidade.

Sinatura do convenio de colaboración entre o Consorcio de Turismo da Ribeira Sacra e Turismo de Galicia.
Sinatura do convenio de colaboración entre o Consorcio de Turismo da Ribeira Sacra e Turismo de Galicia.

Outro dos asuntos incluídos na orde do día do pleno foi a aprobación das bases reguladoras para a creación dos Premios Honoríficos Ribeira Sacra con motivo do décimo aniversario desta entidade. Asemade, dábase o visto bo a proposta de concesión destes galardóns na súa primeira edición (2015) á Xunta de Galicia e á Paradores de España, S.A.

Por outra banda, ese mesmo día, 1 de outubro, tiña lugar en Nogueira da Ramuín a sinatura do convenio de colaboración entre a Axencia Turismo de Galicia e o Consorcio de Turismo Ribeira Sacra. No marco deste convenio desenvolvéronse diferentes actividades entre as que están os 21 murais exteriores, o viñobús, os ciclos de concertos, as rutas de románico ou o programa de outono “A caída da folla na Ribeira Sacra”.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close