Dende as veas dun glaciar ata o deserto de Atacama, seguindo a pegada da auga

A exposición fotográfica “Auga. O sangue da terra”, do monfortino Manuel Valcárcel, poderá visitarse ata o 31 de marzo na Casa da Cultura da Rúa

Trazos azuis sobre un fondo branco de neve. Cunha vista área das canles entrecruzadas no Sandur de Gondley River (Nova Celandia) comeza a viaxe arredor da auga que levaba ao fotógrafo monfortino Manuel Válcarcel a percorrer o planeta. Unha experiencia que plasmaba no 2007 na exposición “Auga. O sangue da terra”. É precisamente a imaxe do Gondley River á que dá título á exposición, “véndoa parece que esas canles fosen veas”, comentaba o seu autor xunto a ela no acto inaugural desta mostra na Casa da Cultura da Rúa na tarde do 11 de marzo. “De feito”, engade, “o título da mostra non llo puxen ata o final xa que nova Nova Celandia foi o último país que visitei neste proxecto”.

A mostra está estruturada en varios bloques cos seguintes títulos: os estados da auga (con imaxes tomadas nos Alpes Meridionais, Nova Celandia en Oceanía), o río Lor e a Serra do Courel, “a auga e a vida” (con instantáneas do río Ganxes, Vacanasi e India, no continente asiático), “as terrazas do Longsheng (China)”, “vivindo na escaseza” (Río Níxer, Mali, en África) e o “Deserto de Atacama” (Chile, América).

Previamente á realización destas imaxes, Valcárcel levou a cabo un labor de documentación e investigación no que contaba co asesoramento de Augusto Pérez Alberti. Todas elas, agás as do Courel, están feitas con cámara dixital. O seu autor destacou a importancia da auga para a vida e a súa relación co ser humano e neste senso considera que o traballo ten unha parte reivindicativa, pero tamén didáctica.

Neste último aspecto incidía a a coordinadora institucional para Ourense e Lugo de Afundación, Beatriz Fernández-Anguiano, no acto inaugural. “Esta é unha maneira de ensinar e de concienciar, é o futuro das vindeiras xeracións”. O acto tamén contaba coa presenza do alcalde da Rúa, Luis Fernández Gudiña, de diversos concelleiros, entre eles a de Cultura, María Albert; e de Diego Fernández Borrajo, director Zona Este Ourense de Abanca.

A exposición “Auga. O sangue da terra», de entrada libre e gratuíta, poderá visitarse ata o 31 de marzo na Casa da Cultura da Rúa, de luns a venres en horario de 10.00 a 13.30 h e de 16.30 a 20.30h, os sábados de 12.00 a 14.00 h e de 17.00 a 20.00 h, e os domingos de 17.00 a 20.00 h.Esta iniciativa é posible grazas á colaboración entre o Concello da Rúa, Abanca e Afundación, institucións que nesta inauguración amosaban o seu interese en seguir colaborando en futuras iniciativas culturais na zona.

Fotos: Carlos G. Hervella

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies