A Xunta de Goberno da Deputación de Ourense aprobou na xuntanza de hoxe, 22 de setembro, a concesión de varias axudas para cooperación cos concellos e para eventos deportivos. Así o explicou na rolda de prensa posterior á Xunta de Goberno a deputada de Transparencia e Goberno Aberto, Montserrat Lama.
No eido de cooperación con concellos, Montserrat Lama explicou que para o Concello da Veiga a Deputación aprobou unha axuda de 100.000 euros destinada ao programa de reactivación da economía rural e da rehabilitación, alugamento e mellora de acceso á vivenda “Revivenda rural”. Seguidamente, para o Concello de Oímbra destinaron unha axuda económica de 10.000 euros para a XX edición da Festa do Pemento. Finalmente, destinarán unha axuda de 50.000 euros para gastos de funcionamento de servizos municipais do 2017 para o Concello de Xunqueira de Espadanedo.
Continuando en materia de cooperación, a Xunta de Goberno aprobou unha axuda de 10.000 euros para a Asociación de Desenvolvemento Rural Comarca de Ourense ADERCOU, para a redacción e posta en marcha do programa Leader 2014-2020.
Por outra banda, aprobaron dúas modificacións do Plan Provincial de cooperación ás obras e servizos municipais e da rede viaria provincial do exercicio 2017. A primeira modificación supón a incorporación ao plan principal a obra “tratamento superficial con microaglomerado na OU-0308”, no termo municipal de Avión, cun orzamento de 60.000 euros. A outra modificación é relativa ao Concello de Calvos de Randín que incorpora ao plan a obra “limpeza e reparación de fosas sépticas en Golpellás, Santiago de Rubiás e Castelaus” por importe de 55.000 euros, en substitución da obra “rehabilitación parcial casa reitoral-residencia”.
Actividades deportivas
Os membros do Goberno provincial aprobaron a segunda convocatoria do concurso para a concesión de axudas a entidades deportivas e entidades sen ánimo de lucro para a organización de eventos deportivos 2017, polo que concede un total de 18.150 euros en axudas a quince entidades para eventos de diferentes disciplinas deportivas.
