Xa o adiantaba Manuel Baltar no seu discurso de investidura como presidente da Deputación e agora comezan a darse os primeiros pasos. Ourense contará cun Clúuster do Viño. Tanto a Deputación como os catros consellos reguladores existentes na provincia acordaban nun encontro na Deputación, celebrado o 16 de xullo, deseñar e establecer as liñas mestras de actuación desta organización, as cales abordarán nunha próxima reunión que celebrarán o vindeiro 4 de setembro na sede do Consello Regulador da Denominación de Orixe Valdeorras.
O clúster, en opinión de Manuel Baltar, “significará un impulso e unha panca de desenvolvemento para o sector, e a presenza da Deputación de Ourense no mesmo fará que lidere a iniciativa unha administración pública perfectamente definitoria do que é a provincia, pois os seus límites territoriais son os do clúster”.
Ademais no decurso deste encontro Baltar e os presidentes dos consellos reguladores das denominacións de orixe vitivinícolas ourensáns (Asunción Rodríguez de Monterrei, José Manuel Rodríguez da Ribeira Sacra, Miguel Ángel Viso do Ribeiro e José Vicente Solarat de Valdeorras) avanzaban noutras liñas de participación que poden
desenvolver, entre as que figura a posta en marcha dunha sede das catro denominacións de orixe vitivinícola cun claro compoñente comercial e promocional dos viños e produtos da provincia de Ourense, “co obxectivo de que os visitantes se poidan informar e tamén degustar os nosos produtos nun edificio de titularidade provincial”, e tamén se falou de que a Deputación colabore activamente nas “Rutas do Viño”.
