Non é habitual, pero a triquinose pode aparecer e consumir a carne infectada por ela ten consecuencias graves para a saúde. Na Clínica Veterinaria Valcán do Barco analizaban recentemente unha mostra de carne de xabarín na que se detectaban larvas de Trichinella. “É moi raro diagnosticala. Dende que abrimos a Clínica eu só a vira unha vez, foi o ano pasado e na carne dun xabarín cazado en Burgos, pero nesta ocasión estamos falando dun xabarín cazado moi preto de aquí, na zona de Fervenza. O peculiar desta mostra é que é unha infestación masiva, hai moitísimas larvas de Trichinella e, con tal cantidade, se unha persoa consume esta carne pode morrer”, explica Jorge Nieto, veterinario de Clínica Valcán.
Cando alguén inxire a carne infectada o que acontece é que “as enzimas dixestivas rompen un quiste que teñen as larvas e éstas chegan á circulación sanguínea e, ao ser un número tan elevado, pasan ao corazón e poden provocar un colapso cardíaco”, continúa o veterinario.
Este tipo de situacións de risco alimentario poden evitarse levando a carne de porco ou de xabarín a analizar a un veterinario. “A triquinose parece una enfermidade un pouco abstracta, da que se fala porque se debe levar a analizar as mostras de carne, pero neste caso vemos que existe e que foi diagnosticada aquí, nunha zona moi próxima ao Barco”, sinala Jorge Nieto.