Na tarde do 12 de decembro celebrábase no Liceo de Ourense a xuntanza do Padroado da Fundación Carlos Casares, na que se daba conta do programa de actividades para o ano 2015 así como do orzamento para o vindeiro exercicio. Na mesma, o presidente Manuel Baltar anunciaba a sinatura do convenio da Deputación de Ourense e a Fundación para o ano 2015, no marco do cal a institución provincial “achegará un total de 30.000 euros para o desenvolvemento de actividades da fundación”, tal e como acordaran na reunión celebrada semanas atrás entre Baltar, o presidente da fundación, Xabier Casares, e os membros desta entidade Hakan Casares e Gustavo Garrido.
Daquela acordouse que a Deputación de Ourense levará a cabo accións de apoio institucional e culturais para difundir e promover a figura do escritor e intelectual ourensán Carlos Casares. En concreto, Baltar confirmou por parte da Deputación de Ourense “a súa máxima implicación co Padroado da Fundación Carlos Casares para colaborar na realización dos obxectivos da mesma, un deles será o vindeiro ano a realización da primeira exposición que amosará a novidosa faceta do “Carlos Casares fotógrafo”.
Na mesma mañá, Manuel Baltar, Xabier Casares e o editor Beito Ledo asistían á presentación da primeira biografía do escritor Carlos Casares, obra de Denis Vicente e publicada pola editorial Ir Indo dentro da colección “Galegos na Historia”.
