Os concellos interesados poden presentar a súa solicitude até o 26 de agosto
A directora xeral de Familia, Infancia e Dinamización demográfica, Amparo González, reuniuse esta mañá en Ourense con alcaldes da provincia para informalos sobre o contido da Orde que regula a concesión de axudas para o investimento en escolas infantís municipais. Actualmente hai 19 municipios ourensáns que contan con este tipo de centros.
“Os concellos interesados xa poden presentar a súa solicitude nun prazo dun mes que rematará o vindeiro 26 de agosto”, salientou González, quen tamén lembrou que estas axudas buscan facilitar a posta en marcha inmediata dos recursos de atención á infancia.