O xantar oficial do Botelo que reunirá mañá a máis de 1.100 persoas no pavillón barquense de Calabagueiros comezou xa a conta atrás.
A maquinaria para a elaboración do menú no exterior do propio pavillón xa se puxo en marcha coa colocación das carpas na parte de atrás do edificio; e tamén no interior, que se convertirá por unhas horas nun gran restaurante, comezaron os labores. De feito, para que ninguén teña dúbidas de onde se ten que sentar e que todo vaia o máis rodado posible, dende o Concello do Barco fixeron pública a distribución das mesas por grupos, indicando o número de comensais por cada un. “Así a xente pode buscarse na lista e xa sabe cal será a súa mesa”, explica a concelleira de Cultura do Barco, Margarida Pizcueta.
A cita será a partir das 14:30h.
