Menos de 24 horas despois da saída de vía en Quiroga, volvíase producir outro accidente na estrada N-120, desta volta na comarca de Valdeorras.
Ás 18:42 h. do martes 15 de outubro, o 112 Galicia recibía o aviso dunha saída de vía á altura do Km 459,7 no termo municipal de Vilamartín de Valdeorras. O vehículo no que viaxaba unha parella de mediana idade saíase da estrada nacional á altura da localidade de Arcos, moi preto do cruce da estrada de Córgomo. Tal como adianta o alcalde de Vilamartín, Enrique Álvarez, o coche quedaba parado entre unhas árbores nun terraplén e a muller quedaba atrapada no interior, tendo que ser sacada polos bombeiros. De seguido, ámbolos dous pasaxeiros (o condutor ferido leve e a acompañante do asento dianteiro ferida de consideración) eran evacuados ao Hospital Comarcal Valdeorras.
Ata o lugar do suceso desprazábanse varias patrullas da Garda Civil, Seguridade Cidadá do Barco e da Rúa, emerxencias sanitarias do 061, os bombeiros e Protección Civil de Vilamartín de Valdeorras.
