O proxecto “Redescubrindo a Via Romana XVIII” continúa neste ano con dúas novas etapas a pé por esta calzada romana, que unía hai 2.000 anos as antigas urbes de Braga e Astorga. Este percorrido comezaba en xullo do 2013 e neste verán o traxecto, que inclúe conferencias e paradas explicativas en determinados puntos, entra xa no territorio ourensán.
Así en setembro afrontaranse dúas novas andainas: o día 13 percorrerase o tramo Baños de Riocaldo (Aquis Ogeresibus)-Portoquintela (Aquis Querquennis) con XIV millas (18 km) e o día 14 o de Portoquintela (Aquis Querquennis)-Sandiás (Geminas) con XVI millas (28 km).
A organización académica desta andaina pola Via XVIII está en mans da Universidade de Santiago e da Fundación Aquae Querquennae-Via Nova en colaboración cos concellos polos que pasa a andaina este ano, entre outras entidades.
Texto: Ángeles Rodríguez