Elvira Fernández (nai) e Laura Fernández (filla) son as fundadoras de InCrescendo Colectivo, unha cooperativa que aposta por dinamizar o rural galego poñendo o foco no corazón das persoas. “Inspirándonos no exemplo dos nosos avós, queremos deixar un mundo mellor ás novas xeracións e demostrar que, na sociedade máis tecnolóxica da historia, o amor segue a ser a materia prima dos soños”, explican estas valdeorresas soñadoras de pura cepa que predican co exemplo.
Namórate da túa vida!, o seu programa de crecemento persoal dirixido a mulleres rurais, chegou a un cento de mulleres nas súas edicións virtuais e presenciais nas provincias de Ourense, Lugo e A Coruña e valeulles a nominación aos XII Premios MOCE convocados pola Fundación Ronsel en colaboración coa Xunta de Galicia en novembro do ano pasado. Paralelamente, o seu proxecto resultou beneficiario dunha das axudas APROL que concede a Consellería de Emprego e Igualdade e acaba de recibir unha bolsa para unha formación en liña dirixida a emprendedoras de todo o mundo en EEUU.
Malia ás diferenzas xeracionais e aos obstáculos iniciais que conleva un proxecto destas características, acrecentados notablemente en tempos de pandemia, no último ano, Laura (coach) e Elvira (mestra) demostráronse a si mesmas que “é indispensable crer en nós, mesmo se iso supón romper con certas convencións e asumir certos riscos”, porque, no fondo “estamos tan afeitas aos barrotes da inseguridade, da culpa, do medo ou do estrés que fomos herdando de nais a fillas que esquecemos o noso valor”.
Lonxe de pretender “empoderar”, o seu traballo céntrase en axudar ás mulleres a reconectar coa súa sabedoría e forza interior, lembrando que non hai nada máis poderoso que dar vida ou dala polos demais. Ese é, precisamente, o caso de Elvira, quen, logo de estudar maxisterio e dedicar case tres décadas ao coidado familiar, aos seus 61 anos perdera a esperanza de cumprir o seu soño profesional.
Por iso, esta fin de semana, coincidindo co Día da Nai, desexan celebrar a consolidación do seu proxecto co lanzamento do movemento ‘Silencio, estamos InCrescendo’ acompañado da súa primeira colección de corazóns pensados para pendurar na porta e animar a outras mulleres a reservarse un tempo e un espazo para elas mesmas sen sentirse culpables.
Con este pequeno xesto, as fundadoras de InCrescendo Colectivo queren facernos “sentir acompañadas no noso crecemento persoal e lembrarnos que, independentemente de cales foran ou sexan as circuntancias, nunca é tarde para crer en nós, sabendo que o compromiso con nós mesmas só pode mellorar a vida dos que están ao noso redor e que é indispensable dar exemplo ás novas xeracións”, aseguran.
E isto é precisamente o que hoxe, de 11:30 a 13 horas na Biblioteca Municipal de Petín, descubrirán @s nen@s de 4 a 15 anos que participen no primeiro obradoiro ‘Silencio, estamos InCrescendo’ onde poderán confeccionar un agasallo para a súa nai inspirado nestes mesmos valores.
Ademais, a inauguración oficial do movemento terá lugar mañá, domingo 1 de maio ás 19 horas nun obradoiro virtual dirixido a aquelas nais e fillas que desexen seguir fortalecendo a súa relación e descubrir o principal segredo que lle permitiu a Laura e Elvira chegar ata aquí.
A inscirición para o obradorio virtual está aberta e pode realizarse a través das redes sociais de InCrescendo Colectivo.