Un mes despois de que no Parlamento de Galicia se aprobase por unanimidade unha iniciativa para que neste verán estivera activa a base do helicóptero contra incendios de Vilanova (O Barco), esta instalación segue inoperativa. Así o constaba a deputada autonómica do BNG por Ourense Noa Presas, que presentaba na Cámara galega a citada proposta. Acompañada por representantes do BNG en Valdeorras, visitaba a base barquense na mañá do 14 de xullo e cualificaba, ante os medios de comunicación, de “irresponsables” ao PP e á Xunta de Galicia xa que “non fixeron absolutamente nada. Estamos aquí e non hai obras empezadas, non hai un acondicionamento e, polo tanto, é difícil de crer que neste verán vai estar operativa”.
Neste senso apelaba á que a Administración galega cumpra coa súa responsabilidade e canto antes esta base estea funcionando”. Para Presas esta petición non é un capricho, “senón unha cuestión de seguridade humana, en primeiro lugar, e unha cuestión de seguridade ao respecto do noso patrimonio natural. Todos sabemos que o Distrito XIII e que esta base son absolutamente estratéxicos, xa non só para toda a contorna de Valdeorras, senón tamén para a parte do Macizo Central e para preservar a riqueza en patrimonio natural que temos nesta área con exemplos como o Parque Natural da Serra da Enciña da Lastra (Rubiá)”.
Presas tamén lembraba que a Xunta ten outro compromiso pendente con Valdeorras: a motobomba da Rúa. “Hai máis dun mes tamén acordamos no Parlamento galego que se ía dotar a este concello con ela e a día de hoxe non hai nin unha soa noticia sobre isto, entón queremos dicirlle, unha vez máis, á Xunta de Galiza que paren de facer mercadeo coas motobombas e que, por favor, doten a esta comarca antes de que veña un agosto moi quente e teñamos que estar lamentando que, unha vez máis, hai unha morea de incendios dos que non somos quen de responder”.
A intención do BNG é seguir insistindo no Parlamento galego sobre estas dúas cuestións. “E ademais non teremos ningún tipo de problema en plantarnos en Valdeorras e en convidar a todos os veciños e aos axentes sindicais a que se mobilicen. Xa está ben, non se trata de dicir que si no Parlamento porque quedamos ben coa comarca e despois non facer nada e esperar a que pase o verán, no que ademais non hai actividade parlamentaria ordinaria, e quedar en silencio”, aseguraba Presas.
Esta parlamentaria amosábase así mesmo moi crítica co novo plan forestal. “Nós entendemos que o anterior xa se incumpriu, por exemplo en canto a expansión do eucalipto, entón o que non podemos facer é aprobar plans que queden en papel mollado. Hai que ter un debate moito máis rigoroso e profundo sobre o aproveitamento do monte, a multifuncionalidade, e ver que necesidades ten cada zona e volver recuperar unha estrutura de mosaico que nos axude a protexer as comarcas”.
No decurso desta visita, a deputada do BNG mantiña un encontro con simpatizantes tanto en Vilamartín como en Rubiá para coñecer de primeira man as súas problemáticas e necesidades e achegábase ata a Feira do Viño de Valdeorras en Viloira. E, no marco da celebración do vindeiro 25 de xullo, lanzaba unha mensaxe relativa a impulsar o peso de Galicia no conxunto do España. “Agora mesmo estanse movendo moitas cousas no Estado, principalmente pola forza que están tendo Euskadi e Cataluña, e Galiza non pode quedar atrás, non imos quedar en absoluto resignados nin en silencio”.
Fotos: Carlos G. Hervella.
