“É un orgullo que Arcos se encha de xente na Festa Coveira”

Carlos López é membro da Asociación de Coveiros de Arcos (Vilamartín de Valdeorras) e propietario da “Cova do López”

Carlos López Gudiña é membro da Asociación de Coveiros de Arcos (Vilamartín de Valdeorras), a cal organiza a Festa Coveira que o vindeiro sábado 13 de xullo celebra a súa sexta edición. Ademais, é propietario dunha delas, a “Cova do López”.

 

Carlos López na súa cova.

 

Cantas covas se van abrir nesta VI edición da Festa Coveira?

Vamos abrir 10 covas. A cova López-Pérez, a do Pablo Israel, aínda que a van abrir outras persoas; a do López, que é a miña; a das Trigarizas, a do Juan, a do José Luís, a do Bautista, a do Vázquez e a do Agustín. Ademais, dentro do recinto imos ter un DJ para a xente máis nova.

Por que se pon un aforo de 1 000 entradas?

Para que non haxa un gran número de persoas e a xente que veña poida andar un pouco desafogada, que non se tropecen uns cos outros. O principal obxectivo é que non se faga unha aglomeración de xente.

Hai algunha novidade nos pinchos deste ano?

Coma todos os anos, haberá uns pinchos comúns para todas as covas e a partir de aí cada unha pon uns pinchos á parte. Por exemplo, nalgunha pode haber ensalada de pasta, ovos recheos, orella… Ademais, haberá panceta á grella no medio da festa.

 

 

Que destacaría da vosa Festa Coveira?

Eu como defensor de Arcos diría que é a mellor, pero diría que é unha zona de gran beleza, que está todo moi limpo, que está acondicionado para a festa…Pero sobre todo destacaría a unión de todos os que formamos a Asociación de Coveiros.

Cantas persoas forman a Asociación de Coveiros de Arcos?

Seremos unhas 15 persoas entre os que abrimos este ano e algún que non abra por diversas cuestións.

Que supuxo a Festa Coveira para o pobo de Arcos?

A orixe destas covas é algo singular, xa que nun principio a xente que era dos pobos do lado, casi non sabía que había covas en Arcos, e agora, cando veñen, moitos din que temos unha riqueza enorme. Non se coñecían as covas de Arcos ata que comezamos a facer esta festa. É por iso que os veciños do pobo están encantados, é un orgullo que Arcos se encha de xente.

Con canto tempo de antelación se prepara unha festa como esta?

Cando rematamos unha edición, facemos as contas e xa se está pensando no ano que vén, pero o forte ven máis ou menos 2 meses antes, porque xa tes que empezar co cartel, coa publicidade, co que se pon de comer, etc. A nosa Festa Coveira sempre é o segundo sábado de xullo, polo tanto en maio comezamos de cheo cos preparativos.

Como xurdiu Don Godellín?

Comezou anos antes nunha celebración do meu aniversario cos amigos. Empezamos a dicir de broma que había que facer un santo para sacalo polas covas. Ao final escribimos nun pano os que nos comprometiamos a correr cos gastos e acabamolo facendo. Despois acabouse herdando para a Festa Coveira, pero nun principio a súa finalidade era para cando fosemos de aniversario.

Que lle diría a alguén que nunca fóra á Festa Coveira?

Pois eu dirialle que viñera e que non llo contaran. Se queda contento que volva, e se non queda contento dicirlle que nós sentimolo pero que sempre o intentamos facer o mellor posible.

Texto: Alba Prada

Fotos: Carlos G. Hervella

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies