A rede de farmacias comunitarias da provincia de Ourense que participa no estudo epidemiolóxico promovido dende o 16 outubro pola Consellería de Sanidade da Xunta de Galicia para detectar posibles casos de asintomáticos de coronavirus entre a poboación continuará facendo test rápidos durante todo o mes de novembro. Así o vén de anunciar o Colexio de Farmacéuticos de Ourense.
No días nos que leva en marcha esta iniciativa realizarónse máis de 6.000 test rápidos nas farmacias. “Esta cifra evidencia o éxito dunha iniciativa na que participan 51 farmacias de varios municipios da provincia, entre eles algúns dos máis afectados pola incidencia de Covid-19 como son Ourense, Boborás, O Irixo, Barbadás, O Carballiño e O Barco de Valdeorras”, segundo o Colexio de Farmacéuticos de Ourense, que preside Santiago Lence.
A iniciativa logrou unha adhesión do 63% das farmacias emprazadas nestes municipios e é susceptible de chegar a unha poboación diana dunhas 140.000 persoas. Trátase dunha medida pioneira en España cuxa misión é “contribuír a frear a curva de contagios na provincia”, tal e como sinala Santiago Leis Vence, que moi pronto será replicada noutros territorios españois. “A participación neste estudo converteu a Ourense en referencia para moitos farmacéuticos doutras provincias e xerou unha gran expectación mediática”, engade Leis Vence.
Así mesmo, dende o Colexio de Farmacéuticos de Ourense asegúrase que a seguridade da iniciativa para os farmacéuticos está “garantida en todo momento debido a que se articulou un estrito procedemento en cooperación coa Consellería de Sanidade. Ademais, a iniciativa contou co respaldo e apoio do Consello Xeral de Colexios Farmacéutico de España e dos Colexios Oficiais de Farmacéuticos da Coruña, Pontevedra e Lugo”.
