A palentina Encarna Ruíz recibiu o primeiro premio, dotado de 1.000€, da oitava edición do Concurso de Microrrelatos Ribeira Sacra-Parada de Sil co seu traballo “Unha vida de película”. A segunda clasificada foi a profesora viguesa Nones Araújo pola súa obra titulada “A preñez desiguala” mentres que o coruñés, Siddharta Álvarez, obtivo o terceiro galardón polo texto “Café solo”.
A entrega de premios tivo lugar no salón de sesións do Concello de Parada de Sil e desenvolvouse cumprindo estritamente as medidas hixiénico sanitarias derivadas da pandemia do coronavirus. O acto foi presidido polo alcalde, Aquilino Gómez, e contou coa presenza do concelleiro de Cultura, Francisco Magide; e do presidente do xurado, Antonio Carreño; este último acompañado de Delfín Caseiro e Arturo Fernández, membros do mesmo.
O certame contou cunha participación récord de 1.044 relatos procedentes de distintas partes de España, América e ata Israel. Durante a súa intervención na entrega de premios, o alcalde quixo destacar este feito sinalando que o concurso supón “un estímulo á nobre arte da escritura”. O concelleiro de Cultura pronunciuse nun xeito similar afirmando que “a alta participación e a calidade dos traballos presentados supoñen tamén un respaldo claro á aposta do Concello pola cultura e polos recursos naturais, artísticos e monumentais da nosa terra”.
Fotos: cedidas.