O alcalde de Ourense, Jesús Vázquez, mantivo esta mañá unha reunión coa directiva da Escola de Técnicos Deportivos Superiores de Cented, coa especialidade en fútbol, que iniciará a súa actividade na provincia a finais deste ano. Na reunión estiveron presentes tamén o edil de Deportes, Mario Guede, o director da escola, Manuel Cerón, o xefe de estudios, Anxo Casalderrey, e o secretario, David Simal.
Avanzaron que os alumnos censados no Concello de Ourense que decidan matricularse nesta escola terán “condicións ventaxosas” na inscrición. Ademais, tamén explicaron que algúns alumnos levarán a cabo a súa formación práctica en diferentes eventos que realice a institución municipal.
A escola é regrada e oficial do Ministerio de Educación, correspondente ao grao medio e superior. Tamén está recoñecida a nivel federativo. Para máis información, a institución pon a disposición a web www.centedgalicia.es.
