A través dun comunicado remito á prensa, o concelleiro de Son de Trives e representante da Mancomunidade do Navea-Bibei, Jorge Vázquez, informa de que vén de remitir un escrito ao presidente desta entidade pedindo explicacións sobre a situación actual na que se atopa a institución.
Segundo se indica no escrito, no pleno extraordinario celebrado o día 7 de outubro de 2019, Jorge Vázquez era nomeado membro do pleno da Mancomunidade, xunto con outros dous representantes de A Pobra de Trives. “Con data 25 de novembro de 2019”, indica Vázquez, “celebrouse o primeiro e único pleno da Mancomunidade, no que se escolleu a presidencia, que recaeu no concelleiro Miguel Sierra”.
Na mesma sesión, citando o texto de Jorge Vázquez, “decidiuse que á maior brevidade convocaríase un novo pleno para a designación das dúas vicepresidencias”, se ben engade que ese pleno “nunca foi celebrado”. Jorge Vázquez asegura que desde esa data “estanse a tomar decisións unilaterais á marxe do pleno e sen informar das mesmas”, o que considera “un xeito escurantista de secuestrar a institución e un atentado contra a democracia”.
Vázquez solicita a celebración “con carácter inmediato” de “plenos da Mancomunidade, “tanto para as designacións que procedan como para iniciar a xestión desta institución desde os seus órganos legais de goberno”.
Finalmente apunta, que tras saber da presentación dun escrito o día 9 de setembro de 2020 por parte do persoal da residencia, “no que expresaban reivindicacións laborais ante a presidencia da Mancomunidade e pedían explicitamente a entrega de copia a todos os membros da Mancomunidade”, Jorge Vázquez solicita que se lle traslade ese documento.
