A formación de música antiga La Morra abrirá o vindeiro domingo 13 de setembro a oitava edición de “Espazos Sonoros”, o ciclo promovido pola Secretaría Xeral de Cultura para a promoción e posta en valor do patrimonio histórico a través de concertos e dunha completa programación de actividades, entre as que se inclúen obradoiros de música antiga, faladoiros e visitas guiadas.
Unha desas actividades chegará ata O Barco de Valdeorras o sábado 10 de outubro arredor da paisaxe cultural e natural, de minas e viñedos de Éntoma. En concreto será nas dependencias de Adegas Roandi e arredores onde se desenvolva a xornada de lecer. Música, unha ruta pola natureza,
actividades e obradoiros para afondar no coñecemento da cultura do viño e algunha que outra sorpresa que agardará aos asistentes neste recuncho da comarca valdeorresa.
O percorrido duns 7,84 quilómetros (3 horas de duración) partirá ás 11h. da igrexa parroquial de San Xoán. A primeira parte do itinerario coincide co Camiño de Inverno, do que se separa para ir tomando altura cara aos lugares das Covas e dos Forroxancos. O camiño continúa ascendendo entre viñas ata o miradoiro da Torrizola e, posteriormente, a ruta descende cara ao río Galir, que haberá que cruzar por un pontón de madeira para regresar á aldea, acompañados polo experto e arqueólogo Santiago Ferrer, que ilustrará sobre a paisaxe dun dos extremos máis orientais da xeografía galega.
De volta en Éntoma, celebrarase un xantar (optativo por 8 euros) nas Adegas Roandi e xa pola tarde, en torno ás 16:30h. obradoiros arredor da cultura e dos procesos de elaboración do viño na propia adega.
O programa rematará co concerto do Quinteto Egeria (de instrumentos de arco con sede en Santigao de Compostela) ao abeiro das barricas de viño, que comezará ás 19h.
