Xunto a el interviñan o alcalde do Barco, Alfredo García, e o ex concelleiro Luis Arias
“Cando se abran as urnas o 25 de setembro teñen estar cheas de rosiñas vermellas”. Era o desexo que expresaba o ex concelleiro barquense Luis Arias ao inicio do mitin que o PSdeG-PSOE celebraba na tarde do 23 de setembro na praza de Viloira (O Barco). Nel tamén pedía aos asistentes que “fagamos de transmisores desta mensaxe aos que non viñeron e non quitan o pano dos ollos, porque non se dan conta de que están enganados”. Tamén falaba da despoboación de médicos no Hospital Comarcal Valdeorras, da discriminación que sufre a comarca sinalando que “os que levan oito anos no goberno non fixeron nada por Valdeorras”.
De seguido interviña o alcalde do Barco e presidente da Federación Galega de Municipios e Provincias (Fegamp), Alfredo García, que subliñaba a importancia destas eleccións galegas “para que cambiemos o rumbo deste país. Se miramos os datos oficiais non hai ningún que indique que Galicia está mellor agora que cando a deixou de gobernar Touriño”. Asemade presentaba a Leiceaga como o mellor candidato a presidir a Xunta de Galicia porque “ten as cousas claras, ten valía, seriedade, rigor e capacidade de chegar a acordos. É garantía de eficacia, de boa xestión e, sobre todo, de cambio”.
García censuraba as políticas do actual goberno galego nos eidos da educación e da sanidade, apuntando que o “PP reduciu a mínimos a asistencia sanitaria no Hospital Comarcal Valdeorras”. E incidía en que a verdadeira queixa fronte a esas situacións ten que manifestarse nas urnas, aí é onde nos xogamos o futuro”.
A clausura do mitin corría a cargo dun convidado especial, o socialista madrileño Antonio Miguel Carmona, economista e analista nalgúns programas televisivos de debate político, quen se amosaba encantado de estar na súa terra xa que “a terra de Pablo Iglesias, ferrolán, é a terra das miñas raíces, a da miña ideoloxía”. Comezaba contando a historia do fundador do partido socialista e “primeiro deputado en Cortes desta organización política”, enfiándoa, a partir de aí, coa traxectoria deste partido político español e os seus logros, especialmente no eido educativo e sanitario dende primeiros do século XX ata a actualidade, pero tamén en servizos sociais e dereitos civís, concluíndo que “os socialistas somos os que temos transformado este país. A nosa ideoloxía é a que fai progresar á nosa sociedade. E criticaba a xestión realizada polo goberno de Feijóo ao fronte da Xunta, destacando os recortes en educación e en sanidade. “Iso é inxusto e é facer menos Galicia”.
Fotos: A.R.