A estación de Manzaneda vén de estrear a tempada con sistema de innivación

A directora de Turismo de Galicia e o presidente da Deputación visitaban as instalacións deste complexo que vén de poñer en funcionamento catro canóns de neve

“Suporá un antes e un despois na estación de montaña de Cabeza de Manzaneda, unha infraestrutura deportiva na que se traballa tamén pola desestacionalización para diversificar a súa oferta de ocio e natureza, ademais de nos meses de inverno, ao longo de todo o ano”. Con estas palabras se refería o presidente da Deputación de Ourense Manuel Baltar á posta en marcha do sistema de innivación neste complexo. Polo de agora funcionan catro canóns de neve, pero prevese que na vindeira tempada o sistema xa estea a pleno funcionamento, segundo destabaca o responsable do goberno provincial, que visitaba a estación na mañá do 12 de xaneiro, acompañado pola directora de Turismo de Galicia, Nava Castro; pola secretaria territorial da Xunta en Ourense, Silvia Dorado, e polo director de Oca Nova Manzaneda, Gustavo Sanmmartín.

Baltar considera que a “firme aposta da Deputación de Ourense, da man da Xunta de Galicia, unha aposta que non ten paragón por modernizar esta infraestrutura, singular no noroeste da Península Ibérica contribuirá a atraer maior competitividade para Manzaneda, Trives e toda esta contorna da provincia, favorecendo un tipo de turismo de calidade ao redor da natureza e o deporte”.

Pola súa banda Nava Castro destaca a importancia da estación, incidindo en que se trata dunha referencia para Galicia e tamén para o norte de Portugal. Ademais dende Turismo de Galicia resáltase que o obxectivo da posta en marcha deste sistema de innivación é “asegurar as condicións de neve a finais de decembro e alongar a tempada ata abril, nunha estación que, a día de hoxe, conta cun volume de esquiadores que supera os 28.000 ao ano, cifra que se prevé incrementar con esta medida. Para acadalo, estase a traballar na posta en marcha deste sistema de xeración artificial de neve que fortalecerá o papel desta estación como un dos maiores recursos de Galicia no eido do turismo activo durante todo o ano, afondando así no obxectivo de desestacionalización que persegue o modelo turístico galego, con propostas atractivas tamén fóra de tempada alta”.

Os primeiros canóns de neve están instalados na zona superior do complexo de Cabeza de Manzaneda, área destinada a esquiadores que se inician neste deporte, visitantes e cursos de esquí. A estación de montaña ten abertas as súas instalacións para a práctica do esquí, incluídos os remontes, con espesores de neve en pó de entre 10 e 25 centímetros, 11,3 quilómetros esquiables e un total de 19 pistas abertas.

Fotos: Carlos G. Hervella.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies