Por sexto ano consecutivo, o colexio plurilingüe Divina Pastora do Barco de Valdeorras é centro examinador para os exames de inglés de “Trinity College”, e este curso como novidade, ofrecerase unha nova proba. Ademáis do exame GESE, realizaranse asemade os exames ISE 0, I, II.
Dende a dirección do centro apuntan que amplían a oferta “para poder dar resposta ás necesidades dos nosos alumnos que, cada vez máis motivados cara á aprendizaxe deste idioma, pediron poder realizar probas para acreditar un nivel máis alto de inglés”.
Debido ao auxe deste tipo de exames e “ao ser o único centro examinador da comarca de Valdeorras, dende o colexio ofrécese a posibilidade de presentarse a alumnado doutros centros ou a cualquera persoa allea ao mesmo” din dende o Divina Pastora. O prazo de matrícula estará aberto do 2 ao 20 de marzo podendo informarse das probas na páxina web do colexio. Ademais, a última semana do mes de febreiro os membros do Departamento de Inglés darán charlas informativas sobre estes exames e sobre os Cursos Intensivos de Preparación (reservados para os alumnos do propio centro).
