Inmersos no proxecto PITEAS, os alumnos de 4º e 5º de Primaria do CEIP Plurilígüe Condesa de Fenosa puxeron todo o seu empeño en axudar ás protectoras de animais do Barco de Valdeorras como Peludines Callejeros ou Patrulla Felina e vaia se o conseguían.
En torno ás 500 persoas participaban na tarde do 26 de abril na carreira/ andaina “Pelo, Pico, Escamas” organizada polos cativos do centro barquense para recadar produtos para animais (especialmente para perros e gatos). Alimentos, medicinas ou xoguetes era o que tiñan que aportar os participantes ao inscribirse, e a resposta foi máis que positiva, superando as expectativas dos propios rapaces que se amosaban moi contentos co resultado do seu traballo.
A carreira comezaba pasada as oito da tarde e percorría parte do malecón barquense, subindo pola praza Andrés de Prada e baixando pola rúa da Estación ata o Malecón ata regresar ao colexio. Tal como suxerían os organizadores, algúns dos participantes correron coas súas mascotas.
Fotos: Carlos G. Hervella.