A experiencia vivida o pasado verán por tres montañeiros do Club Alpino Ourensán nos Dolomitas (Italia) pode agora descubrirse a través das 14 imaxes de gran formato que conforman “Vértigo”, unha exposición que pode visitarse no Pavillón dos Remedios ata o día 23 de marzo. Con elas logran achegar o reto deportivo e esa convivencia en vertical, ademais de transmitir o engado desta paraxe italiana.
“Son fotos de 60 cm de ancho por 1,20 de alto. Queríamos facelas nun tamaño grande para transmitir a magnitude que ten ese lugar. A través delas pretendíamos amosar os valores que envolven á montaña: a solidariedade, o compañeirismo, o pór a vida nas mans doutra persoa… e os elementos non competitivos do montañismo. Pero tamén buscamos comunicar todo o entusiasmo e intensidade que sentimos pola montaña e polos espazos naturais onde se practica este deporte”, sinala Víctor Barro, autor das fotos e un dos membros da expedición xunto con Alfonso González e Ernesto Fernández.
Esta exposición forma parte de “Achégate á montaña”, un programa de actividades que comezaba en febreiro cun curso de iniciación á escalada e unha saída. Continuará en marzo coa charla “Dolomitas 2014-Vértigo”, que se impartirá o día 12 de marzo ás 20h. no Local social do Club Alpino Ourensán. Tamén se desenvolverá un curso de fotografía na fin de semana do 21 e 22 de marzo nos Ancares leoneses.
Este programa conta co apoio do Club Alpino Ourensán, do Consello Municipal de Deportes de Ourense e da tenda de montaña K-2, entre outros. As persoas interesadas en anotarse ou ampliar información poden consultar a web do club: www.clubalpinoourensan.es.
Texto: Ángeles Rodríguez
Máis información na edición en papel do Periódico O Sil