Como o único acto organizado en Galicia dentro da XXI Semana Europea da Calidade, Expourense vén de celebrar un ano máis unha Xornada de Exaltación da Calidade. O acto tiña lugar o 12 de novembro, Día Mundial da Calidade, e incluíu a entrega da 5ª edición dos premios “Líderes en Calidade” a empresas e institucións galegas recoñecidas por ser un modelo a seguir nos seus respectivos sectores e das que destaca o seu compromiso coa Calidade e co Medio Ambiente.
As entidades elixidas como “Líderes en Calidade” polo Comité Executivo de Expourense no 2015 son: Artesanos Gallegos de la Carne (Lugo), no sector alimentación; AXEGA – Axencia Galega de Emerxencias 112 (con sede en Santiago de Compostela), no sector sanitario; ICEACSA Grupo (A Coruña), en internacionalización; Colexio Lar (Vigo), no sector educación; e Ataúdes Gallego (Piñor de Cea – Ourense), en medioambiente.
A entrega de premios contou coa presenza e intervención da delegada territorial da Xunta de Galicia, Marisol Díaz, do alcalde de Ourense, Jesús Vázquez e do vicepresidente da Deputación Provincial de Ourense, Rosendo Fernández, que estiveron acompañados por representantes do Padroado de Expourense, ademais de polo subdelegado do Goberno, Roberto Castro.