Rozando ás 19h. desta tarde de 12 febreiro producíase un accidente de tráfico na estrada N-120 ao seu paso polo termo municipal de Rubiá, antes de chegar ao primeiro túnel da Barosa (dirección Ponferrada). Chocaban de fronte un turismo e un camión. Como consecuencia do impacto, o coche quedou encaixado no camión.
A persoa que conducía o turismo quedaba atrapada no seu interior, “polo que foi necesaria a intervención dos Bombeiros de Valdeorras”, tal e como informa o 112 Galicia.
“Ante a probabilidade de que houbese persoas atrapadas no interior, o persoal do 112 Galicia pediu, de inmediato, a colaboración dos bombeiros para liberar ao ocupante do coche. Con todo, os profesionais de Urxencias Sanitarias de Galicia-061 nada puideron facer por salvarlle a vida”, segundo informa o 112 Galicia.
Tamén se mobilizou aos efectivos do GES de Valdeorras e aos axentes da Garda Civil, “que se encargaron da xestión do tráfico e recoller toda información sobre esta colisión mortal”, segundo o 112 Galicia.