Quiroga rexistra 95 casos activos de Covid, 12 máis que onte, segundo os datos datos comunicados ao Concello por parte da Consellería de Sanidade (actualizados o 26 de xaneiro ás 18h.). “Con estes datos e a pesar xa de levarse máis de 350 probas diagnósticas feitas a veciños de Quiroga, o Sergas decidiu realizar un cribado masivo da poboación a partir do luns”, tal e como vén de informar o Concello. O rexedor local, Julio Álvarez, vén pedindo dende o sábado, cando se coñecía o positivo de 18 persoas nun só día, que se realizara un cribado da poboación.
“O Sergas está agora organizando como se realizará e onde, así como cal é a poboación susceptible de facelo. Aínda que todo apunta a que serán probas de antíxenos, o único claro polo momento é que se realizará polas tardes a partir do luns e que será persoal do Sergas o que se poñerá en contacto coas persoas que terán que facelo para comunicarlles cando e onde deberán facer as probas”, adianta o Concello de Quiroga.
Estes datos coñécense o mesmo día en que entran en vigor as novas medidas que decretou a Xunta de Galicia para tentar atallar esta terceira onda da pandemia: peche perimetral do municipio, limitación das reunións sociais ás persoas conviventes e mantense o toque de queda ás dez da noite, entre outras medidas.