En portadaÚltima hora

Fegamp e Xunta renovan o convenio para manter o funcionamento dos GES

O novo documento recolle, ademais do acordo en materia de financiamento, a delimitación de funcións destes grupos de intervención para que estean especializados en tarefas de prevención de emerxencias e de protección civil
Os represantes da Xunta e o presidente da Fegamp, asinando o acordo.

A Federación Galega de Municipios e Provincias (Fegamp) e a Xunta de Galicia veñen de asinar nesta mañá de 26 de decembro o convenio de colaboración para seguir mantendo e mellorando o funcionamento dos Grupos de Emerxencia Supramunicipal (GES), nun acto onde participaron o vicepresidente da Xunta, Alfonso Rueda; o conselleiro de Medio Rural, José González; e o presidente da Fegamp, o alcalde barquense Alfredo García.

Este convenio vén a substituír o anterior, que estaba vixente desde 2013, e recolle ademais do acordo en materia de financiamento, a delimitación de funcións destes grupos de intervención para que estean especializados en tarefas de prevención de emerxencias e de protección civil.

“Nesta ocasión, o acordo será de carácter trienal e suporá un investimento por parte do Goberno galego de 13,7 millóns de euros -cofinanciados polo Fondo Europeo Agrario de Desenvolvemento Rural (Feader)- para o financiamento destes grupos de intervención, o que supón o 52,5% por cento do total do seu custo, tal e como se acordou no marco das reunión previas mantidas entre Xunta, Fegamp e deputacións provinciais co fin de acadar o máximo consenso á hora de renovar o convenio para o mantemento destes grupos de intervención, que prestan un servizo fundamental na atención ás emerxencias”, segundo se informa dende a Xunta de Galicia.

 

O vicepresidente da Xunta, Alfonso Rueda; o conselleiro de Medio Rural, José González; e o presidente da Fegamp, Alfredo García, tras a sinatura do convenio.

Entre as funcións dos GES, pode destacarse a intervención en incendios forestais e urbanos no ámbito territorial da súa demarcación, en coordinación co distrito forestal ou co parque comarcal de bombeiros, en función do tipo de lume; prácticas preventivas nos terreos forestais, camiños e espazos públicos para previr incendios; actuacións de prevención de pragas, como a Vespa velutina; ou intervencións en situacións de risco e de emerxencia para manter a rede de estradas ou en situacións derivadas de riscos naturais. Os GES tamén poden manter colaboracións con protección civil ante calquera situación que implique riscos para persoas, bens ou o medio ambiente.

O vicepresidente da Xunta, Alfonso Rueda destacou que é este convenio un exemplo de colaboración, no que colaboran a Xunta, Fegamp e as Deputacións provinciais para garantir a seguridade dos galegos e para completar o mapa de reposta ás emerxencias.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close