Na mañá do 11 de xuño era presentada no Centro Cultural “Marcos Valcárcel” da Deputación de Ourense, a 43ª edición da Festa do Peixe de Bande, que contou coa presenza do presidente provincial Manuel Baltar, do alcalde de Bande José Antonio Armada, do representante do club O Peixe José Emilio Rodríguez, e do organizador da proba ciclista de BTT David Sánchez.
A festa, declarada de Interese Turístico de Galicia, celebrarase en Bande a vindeira fin de semana, os días 13, 14 e 15 de xuño, e unha das novidades máis salientables desta edición é o campionato solidario de pesca “unha proba que ten como obxectivo axudar ás persoas máis necesitadas, e, nese senso, as capturas que os pescadores recollan no río o domingo, día 15, irán destinadas ao Banco de Alimentos de Ourense”, segundo confirmou José Emilio Rodríguez.
Tal como explicaron na presentación “a festa recoñece a aqueles pescadores que teñen demostrado o seu compromiso cos nosos ríos, a preservación das especies e o seu coidado”.
Outra das novidades desta edición é a celebración dunha proba BTT. Segundo explicou David Sánchez “xa son máis de 100 os participantes inscritos, que percorrerán dúas rutas (de 30 e 44 quilómetros) nun trazado que servirá para poñer en valor a nosa natureza e paisaxe”.
Ao longo da fin de semana, a festa contará asemade con mercados de artesanía, stands gastronómicos, exhibicións de patinaxe, concerto de acordeóns, a actuación dos Bolechas para os máis cativos, unha ruta cabalar, e o acto de entrega de premios para as diferentes competicións.