Festa dos Maios en Verín

A celebración tiña como escenario un ano máis o 1 de maio a praza da Alameda desta vila

Dende os anos oitenta a praza da Alameda de Verín vén acollendo cada 1º de maio a tradicional Festa dos Maios.  Nesta ocasión a exposición dos maios tradicionais e artísticos tiña lugar entre as once da mañá e as oito da tarde e dela formaban parte os presentados polo Colexio Privado Plurilingüe María Inmaculada, o Colexio Apostólico Mercedario, o CEIP Princesa de España, o CEIP Amaro Refojo e o CRA Monterrei; e pola Asociación de Mulleres Rurais Flor da Xesta, a Asociación de nais e pais de alumnos e alumnas do Conservatorio de Verín, o Centro de día de Verín Raiola e, como xa vén sendo habitual neste Certame en lembranza da persoa que recuperou a tradición dos Maios en Verín, da Asociación Verinense de Amigos da Música.

E dende as 11:00 horas da mañá estaban á venda as coplas do Certame Enrique Gómez Pato, editadas polo Concello de Verín (cada exemplar custaba 1 euro.) O diñeiro recadado coa venda de 500 exemplares destinarase ao financiamento de programas de asistencia social da Cruz Vermella na comarca de Verín.

Este ano, a Praza García Barbón acollía ademais a cuarta edición da Feira Solidaria de Verín coa participación dunhas  trece entidades sen ánimo de lucro, que ofrecían todo tipo de produtos e/ou servizos con fins solidarios.

A historia dos Maios en Verín

A Festa dos Maios recuperouna en Verín Enrique Gómez Pato a comezos da década dos cincuenta, tal e como lembran dende o Concello. “O Pato”, coa colaboración dos seus fillos, e, anos máis tarde, a Asociación Cultural Os Choupos e o Movimiento Junior foron os continuadores desta exaltación da primavera en esculturas efémeras e de crítica social dos acontecementos locais ou externos en verso rimado. No segundo goberno municipal democrático, no primeiro quinquenio dos oitenta, a festa viuse reforzada, con subvencións a Maios e coplas feitos por asociacións, colexios e institutos; aliciente gastronómico e actividades paralelas.

Fotos: Concello de Verín.

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies