Cando con empeño e esforzo se consegue recuperar algunha tradición ou celebración característica dunha localidade, é importante mantela a toda costa. Por iso dende que os veciños do barrio de Xeadre, na localidade de Rubiá, recuperaban os festexos na honra a Santa Mariña, patrona do pobo, ano tras ano séguense celebrando. Con máis ou menos recursos, máis ou menos actividades, pero como unha cita xa ineludible. a terceira fin de semana do mes de xullo.
Así pois, hoxe venres 17 arrancan os actos con animación musical a cargo da dicomovida A Boa Festa pero non será ata mañá sábado 18, cando comecen oficialmente os actos, coa sardiñada popular á que cada ano a comisión convida aos veciños. Será en torno ás nove da noite cando comece a cea na que tampouco faltarán os doces e a bebida, tendo asegurada a festa rachada de novo a cargo da discomovida A Boa Festa que porá o broche musical á velada.
Ao son dos ritmos máis marchosos do panorama musical que a discoteca móbil achegará ata Rubiá, amencerá o día grande da festa na honra a Santa Mariña. O acto central da xornada será a procesión prevista para as 12h. coa imaxe da Virxe dende Xeadre ata a igrexa parroquial de Rubiá onde terá lugar a eucaristía na súa honra. A comitiva, encabezada polos sacerdotes e a imaxe, e seguida polos fieis, irá acompañada pola charanga Os Imparables que porá o son ao acto.
Xa pola tarde, haberá de novo baile na praza, a cargo da orquestra Trip Montecarlo que animará a festa en sesión de tarde longa, sen verbena, despedindo as festas de Santa Mariña en Xeadre ata o vindeiro ano.
Máis información na edición en papel do Periódico O Sil.