En portadaÚltima hora

Fin de semana para descubrir os secretos do ceo no VI Astro Trevinca

Na apertura destas xornadas, que se celebrarán do 4 ao 6 de outubro, o alcalde da Veiga criticaba que "as Illas Atlánticas manteñan o certificado Starlight porque non cumpren ningún dos parámetros"

Cunha observación astronómica dende o miradoiro estelar das Tablillas (A Veiga) poñíase en marcha na noite do 4 e outubro a sexta edición de “Astro Trevinca, Xornadas de astronomía no mellor ceo de Galicia”. O seu programa contén varias observacións nocturnas, pero tamén diurnas, ademais dunha serie de ponencias que se iniciaban a primeira hora da mañá do 5 de outubro no salón de actos do Toural da Veiga.

Na apertura do encontro o alcalde da Veiga, Juan Anta, reivindicaba un “turismo sostible  e de calidade” e convidaba aos participantes neste foro, chegados de fóra, a converterse en “embaixadores do ceo de Trevinca (que conta con certificado Starlight) porque esa é a única maneira de que defendamos ese turismo, de que poidamos vivir da nosa contorna e mantela intacta. Temos que defender e promocionar o ceo da Veiga como un dos mellores destinos do mundo”.

O rexedor amosábase moi crítico co feito de que as Illas Cíes sigan mantendo o certificado Starlight “non é de xustiza porque non cumpre ningún parámetro para ter ese selo a día de hoxe”. Explicaba tamén o proxecto do novo observatorio astronómico que se porá en marcha en breve neste municipio valdeorrés. “Queremos facer del un sitio para todos os público, temos que intentar que a astronomía sexa didáctica, divertida e que chegue a todo o mundo, facendo disto un referente do turismo sostible en Galicia”.

Deseguido, o coordinador das xornadas, Óscar Blanco, facía unha pequena introdución lembrando a orixe deste proxecto, que tiña a súa xénese anos atrás nunha “quedada”, pero que despois se convertiu nalgo máis formal “sen perder o que somos, un grupo de xente afeccionada á astronomía e aos que nos gusta compartir, desfrutar e ver o ceo. E con esa idea organizamos unha fin de semana longa con noites de observación, conferencias máis ou menos profesionais ou amateurs”.

A primeira das intervecións corría precisamente a cargo de Óscar Blanco quen compartía a súa experiencia astronómica en Chile na charla titulada “Un paseo polo ceo astral”.  Despois interviña Alberto Aparici coa ponencia “Medindo o universo en expansión. Descubrimentos, preguntas e polémicas” e Carmen Denébola Álvarez, que presentaba o “I Congreso estatal de astronomía en Galicia”.

A mañá completábase cunha observación solar e despois do xantar está previsto que interveña Mario S. García para falar sobre a “Calculadora de eclipses”, Pablo Martínez abordará a “Historia dunha carreira espacial” e logo proxectarse o filme “Saving de dark” (S. Murali, 2018). A xornada finalizará cunha nova observación nocturna.

Xa o domingo 6 de outubro farase, pola mañá, unha visita ao novo observatorio astronómico da Veiga e Trevinca.

Ademais durante esta fin de semana poderá desfrutarse en tres establecementos de hostalaría da Veiga de menús “G-Astronómicos. Astrotrevinca 2019”: nas Chairas, Bar Yáñez e Eido das Estrelas.

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close