Chega o Entroido a San Xoán de Río!! e malia non ter unha grande tradición, a AC RíoMola e o Concello uniron esforzos para elaborar un programa de actividades para estas datas. “Esperamos que este ano sexa un punto de inflexión para cada ano desfrutar dun mellor Entroido”, explican dende a Asociación Cultural RíoMola.
Centrados na tarde do sábado 10 de febreiro, “para que a xente poida desfrutar o resto de días das actividades dos concellos veciños”, os actos comezarán ás 16h. no Centro Social cun desfile de disfraces e animación musical. “Trátase dunha actividade centrada nos mais novos e se o tempo o permite, farase un desfile polas rúas do concello. En caso contrario a actividade realizarase dentro do local no que todos os asistentes poderán degustar de forma gratuíta chocolate con churros”, explican dende RíoMola.
E xa en torno ás cinco da tarde chegará a Río “o folión máis festeiro e colorido do país”. Tralo desfile pola mañá de Chandrexa de Queixa, A Caniceira chegará a San Xoán de Río para poñerlle ritmo á tarde de sábado, polo que dende a organización animan a todo o mundo “a traer o seu instrumento (bombo, sacho e martelo, etc,) e incorporarse a este desfile tradicional e máxico polas rúas do noso concello ao ritmo da Caniceira”. Ao remate todos os participantes degustarán unhos pinchos no Bar Cruceiro.