En portadaÚltima hora

Folións, Boteiros e gastronomía no Entroido 2019 de Viana do Bolo

O Concello presentaba este 4 febreiro o programa da “festa por antonomasia” desta vila, que se desenvolverá do 21 de febreiro ao 6 de marzo
Boteiro dun dos folións de Viana do Bolo./ Foto: A.R.

Se ben é a saída dos folións polas rúas a que marca cada ano o inicio do Entroido en Viana do Bolo, o programa “oficial” de actos desta celebración non comezará ata o 21 de febreiro, Xoves de Compadres, e prolongarase ata o Mércores de Cinsa, 6 de marzo.

“No medio teremos como días máis destacados o Xoves de Comadres, o Domingo Gordo e o Martes de Entroido”, así o destacaban na presentación do Entroido 2019 de Viana do Bolo o alcalde deste municipio, Secundino Fernández, e a concelleira de Cultura, Graciela Diéguez. “O Entroido é a festa por antonomasia de Viana do Bolo, é unha tradición que xa vai nos xenes”, engadían.

Ademais das colgas dos lardeiros, dos desfiles, fariñadas e da ILIX Festa da Androlla, prevista para o 3 de marzo ás 14:30h. no pavillón (as entradas terán un prezo 17 euros e estarán á venda nas oficinas municipais, 988 340120); haberá “música con numerosas charangas e discomóbil, cinema cun ciclo arredor do Entroido na Casa da Cultura, exposicións…”, adiantan dende o Concello, que ten previsto presentar esta celebración no marco de Xantar (do 6 ao 10 de febreiro) cun espazo expositivo propio “no que divulgaremos esta tradición”.

 

O alcalde de Viana do Bolo, Secundino Fernández, e a concelleira de Cultura, Graciela Diéguez, na presentación do programa do Entroido 2019.

 

O rexedor tamén destaca que “no noso entroido o máis importante é o pobo, a veciñanza que sae cos folións e os Boteiros, carrozas, a fariña, a androlla; é dicir o tradicional que se vive nestas datas. Este ano duplicamos os premios para as carrozas para animar a elaboración e presentación deste elemento tan importante sobre todo no domingo gordo. Así haberá 3.000 € para este apartado, e 900 € para os premios de disfraces”.

 

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close