Tras pasar por Santiago de Compostela (28 e 29 de novembro), “Galicia Calidade en ruta” percorrerá en decembro Ourense (o día 2), Pontevedra (o día 6), Lugo (9), Vigo (12 e 13), Ferrol (16) e A Coruña (19 e 20). Trátase dun roadshow no interior dun camión adaptado, no que se realizarán diversos showcookings, catas de viños e degustacións de produtos amparados por Galicia Calidade. Esta singular iniciativa está destinada a profesionais do sector da gastronomía (hostalaría, restauración e retail), así com a consumidores e prescritores, para promover as virtudes dos produtos certificados pola marca de garantía.
As accións que se desenvolverán nas sete cidades galegas serán diferentes. A primeira delas, denominada “Esencial”, consiste nunha degustación de “bocados de Galicia Calidade”, elaborados polos chefs Marián Rodríguez e Iván Méndez e que ofrecerá unha ampla mostra da versatilidade e excelencia dos produtos. A segunda, denominada “De viños Galicia Calidade”, consiste nunha maridaxe dos viños amparados por este selo con outros produtos como os xamóns, embutidos ou queixos, baixo a dirección de prestixiosos sumilleres como Xoan Cannas.
Nas cidades de Santiago, Vigo e A Coruña tamén se realizarán dúas accións máis en cada unha delas, con especial atención aos almorzos e ás conservas. Así, o “Almorzo Galicia Calidade” ofrecerá a combinación dun almorzo de calidade con café, leite, froitas, doces e outros produtos, baixo a direción do coñecido barista Oscar de Toro. A mostra “A Lata de Galicia Calidade” pretende destacar o valor e a versatilidade das conservas amparadas por este selo e o seu desenvolvemento en receitas gastronómicas.
No acto de inauguración desta campaña en Santiago o 28 de novembro, a directora xeral de Comercio e presidenta de Galicia Calidade, Sol Vázquez Abeal, defendía que a marca Galicia Calidade é “o mellor pasaporte” das empresas galegas, xa que representa o “ADN galego dos produtos e servizos e o compromiso coa calidade”. Tamén engadía que con esta nova estratexia preténdese conseguir que, “pouco a pouco, os consumidores e usuarios identifiquen que Galicia é igual a Calidade”. Neste senso, salientou que esta aposta “é o mellor xeito de acceder aos mercados máis competitivos e esixentes”.
Nesta mesma presentación o director xerente de Galicia Calidade, Alfonso Cabaleiro, aseguraba que “Galicia Calidade, en ruta” pretende contribuír a “xerar valor engadido aos produtos e servizos desenvolvidos en Galicia, mediante a certificación de calidade que é o que transmite confianza e seguridade aos consumidores”. E matizaba que esta acción de promoción está enfocada aos profesionais e prescritores de opinión (aínda que tamén participará o público en xeral) co obxectivo de “poñer en valor os produtos do sector alimentario certificados por Galicia Calidade. “Facémolo primeiro en Galicia, porque ás veces non valoramos o que temos”.
A campaña Galicia Calidade en ruta enmárcase na estratexia de reforzo de Galicia Calidade, que cumprirá 20 anos en 2015, unha marca recoñecida e valorada polos consumidores que conta con máis de 250 produtos certificados, de 51 empresas diferentes.
