Entre mañá mércores 19 e o venres 21 de novembro, celébrase na Tecnópole en Ourense, a maior feira científica de Galicia, Galiciencia, coa exposición de 64 proxectos, 27 de colexios da provincia de Ourense, 20 de Pontevedra e 13 da Coruña, e 4 de Barcelona.
Ao longo destes tres días espérase que máis de 2.000 persoas visiten a feira, un evento que foi recoñecido como “unha das doce actividades de referencia da Semana da Ciencia en España pola Fundación Española para la Ciencia y la Tecnología (FECYT), patrocinadora do evento xunto coa Xunta de Galicia”.
Tal como explican dende a Tecnópolo, os participantes recibirán mañá mércores a visita do conselleiro de Economía e Industria, Francisco Conde, e durante os días que dure, a entidade organizadora acollerá no seu recinto unha carpa na que 44 equipos de Secundaria e FP mostrarán ao público os seus proxectos científicos e de innovación. Este ano, como novidade, a feira conta cunha sección especial na que expoñerán 20 equipos de Primaria.
Todos eles recibirán a visita de grupos escolares de toda Galicia, ás que se sumarán as persoas que acudan pola súa conta, xa que a feira é de entrada libre para particulares e familias, coa exposición de proxectos aberta de 10 a 13 e de 15 a 18h.
Segundo os datos facilitados pola organización, este ano a representación máis numerosa na exposición de proxectos procede dos colexios de Ourense e Pereiro de Aguiar, cun total de 27 equipos defendendo as súas investigacións e inventos.
Galiciencia chega á súa novena edición cunha ampla oferta de actividades paralelas que inclúe a conmemoración do Ano Internacional da Cristalografía e da Agricultura Familiar e do Ano da Biotecnoloxía en España, a través de varios talleres nos que os participantes experimentarán cos cristais e coñecerán cales son os procesos biotecnolóxicos tradicionais da agricultura familiar.
Estos talleres complementaranse con actividades de planetario e robótica LEGO para os máis pequenos e un obradoiro de tecnoloxías punteiras para os maiores, xunto cunha charla sobre a relación entre a ciencia e a música que poderá visualizarse online dende calquera centro educativo de Galicia.
Durante a clausura, ademais da entrega de premios aos mellores proxectos por categorías, darase a coñecer o gañador do concurso de fotografía científica convocado no marco deste certame.