O Concello de Ourense acolleu este martes, 24 maio, a presentación da décima edición de Galisenior, o Salón Internacional das Persoas Maiores, que se celebrará entre as xornadas de mañá e do xoves (25 e 26 de maio). O eixo central sobre o que xirará a edición deste ano será a prevención das situacións de fraxilidade nos maiores. A cita volve contar co apoio de todos os axentes sociais involucrados na mellora da calidade de vida e benestar deste segmento de poboación. Administracións, empresas do sector, Universidade, colexios profesionais e numerosas asociacións do sector daranse cita neste expositor.
Ao acto de presentación do salón acudiu o alcalde de Ourense, Jesús Vázquez, acompañado da edil de Asuntos Sociais e Sanidade, Sofía Godoy, o xefe territorial da Consellería de Política Social, José Selas, o vicepresidente da Deputación de Ourense, Rosendo Fernández, o presidente do comité asesor de Galisenior 2016, Alberto Vaquero, e a directora adxunta de Expourense, Emma González.
Nesta edición, a feira contará coa participación de medio centear de expositores que mostrarán as últimas novidades nos servizos para a terceira idade. Pero tamén haberá un apartado adicado a xornadas técnicas, especialmente enfocado para profesionais. Nelas participarán 40 relatores de España e Portugal.
Estarán especializadas no tema principal deste ano, na prevención de situacións de fraxilidade nas persoas maiores. Pero ademais tocarán outros temas como a promoción da autonomía baseada nas novas tecnoloxías, experiencias na promoción do avellentamento activo e saudable ou recomendacións nutricionais, entre outros.
Canto ás actividades para maiores, na área de participación activa Galisenior presenta unha oferta con máis de 50 programas diferentes, dirixido a todos aqueles visitantes -persoas mairoes e familias ou coidadores-, que pretende fomentar a adopción de hábitos saudables e preventivos.
A feira estará aberta en horario de 10 a 14h e de 16 a 19h ambos os dous días. A entrada e a participación nas actividades son gratuitas. Para asistir ás xornadas técnicas haberá que inscribirse previamente.