Publicidade
EconomíaEconomíaÚltima hora

O GDR Valdeorras xestionará 3,8 millóns de euros ata o 2020

A presidenta e o persoal técnico desta entidade, que agrupa aos nove concellos da comarca, facían balance dos primeiros meses de actividade
O GDR7 convocaba unha rolda de prensa para facer balance dos primeiros meses de actividade do grupo./ Foto: A.R.

No seu primeiro semestre de actividade o Grupo de Desenvolvemento Rural de Valdeorras (GDR7) conta con 11 proxectos financiados por valor de 345.000 euros. Deste total tan só un é un proxecto produtivo: a modernización de equipamentos para a realización de actividades recreativas nas zonas rurais da comarca, cun orzamento de 32.000 euros.

Os outros dez son proxectos de diverso tipo presentados polos concellos valdeorreses. Así favorecerase a instalación de puntos de rede wifi en Petín (5.800 euros) e mellorarase a accesibilidade no seu telecentro (38.000 euros), acondicionarase o espazo urbano da ponte Casaio en Carballeda (50.000 euros), faranse melloras no centro apícola veigués de Prada (30.000 euros), adaptarase o telecentro de Freixido en Larouco (18.000 euros), acondicionarase o entorno da capela dos Navallos de Celavente no Bolo (57.000 euros), rehabilitarase a Casa dos Camineiros de Viloira (50.000 euros) e favorecerase a mellora ambiental da Reza-O Aguillón na Rúa (17.000 euros). Ademais o Concello de Rubiá rehabilitará un tramo da Via Nova ao seu paso polo Parque Natural da Serra da Enciña da Lastra (26.500 euros) e levará a cabo obras en Oulego e Robledo para recuperar patrimonio natural e cultural (18.000 euros).

Para asignar investimento a estes proxectos, o GDR7 priorizou aqueles que contribúan a superar o illamento do territorio “a través da creación e mellora de servizos dirixidos á poboación rural. Ademais deu preferencia aos que contribúan á conservación e mellora do medio ambiente a través dunha xestión eficiente dos recursos e tamén a aqueles que fomenten a mellora da competitividade produtiva e os índices de emprego no territorio”, segundo explicaba a presidenta deste GDR e alcaldesa de Carballeda, María Carmen González, quen estaba acompañada na rolda de prensa por persoal técnico do grupo.

 

A presidenta do GDR7, nun dos momentos da rolda de prensa./ Foto: A.R.

Ademais o xerente do GDR7, Luis Rodríguez, anunciaba que teñen previsto realizar unha serie de charlas informativas polos concellos de Valdeorras para “informar aos veciños sobre os proxectos que van a financiarse”. Neste obxectivo de difusión enmárcase tamén un seminario específico co obxectivo de analizar as claves do Plan Leader para o desenvolvemento rural da comarca, que terá lugar o mércores 11 de outubro na Casa Grande de Viloira (O Barco).

O GDR7 é un dos seis que están operativos na actualidade na provincia de Ourense e xestionará 3,8 millóns de euros ata o vindeiro ano 2020. Neste senso, os responsables deste grupo animaron aos emprendedores a preparar e presentar proxectos de cara á vindeira convocatoria do 2018.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close