Galerías de fotosPolíticaÚltima hora

Gonzalo Caballero abre a campaña das municipais apoiando ao candidato socialista á alcaldía do Barco

O secretario xeral do PSdeG-PSOE pedía o apoio para “os candidatos socialistas porque somos a opción natural do progreso para resolver os problemas dos municipios pequenos e do medio rural”

Ata Valdeorras e, máis en concreto ao Barco, se desprazaba o secretario xeral do PSdeG-PSOE, Gonzalo Caballero, na mañá do 10 de maio para abrir a campaña electoral ás municipais e ás europeas “a pé do país, percorrendo os diferentes concellos de Galicia”, destacaba.

E escollía O Barco para comezar estes 15 días de campaña porque “é un concello de referencia pola súa realidade económica, xeográfica, pola súa realidade social, porque representa tamén a importancia da comarca de Valdeorras, e porque no Barco temos os socialistas un alcalde de referencia, o presidente da Fegamp, un alcalde consolidado que leva moitos anos traballando, pero que ten a mesma enerxía que cando empezou e que está disposto a seguir dando o mellor de si para que con maiorías claras, contundentes O Barco siga tendo un espazo na política galega, e na española”.

Caballero referíase ademais ao conxunto da candidatura socialista no Barco asegurando que “combina experiencia e renovación, homes e mulleres dispostos a traballar por este concello”. E resaltaba que “o PP esqueceuse ao longo do goberno de Feijóo da importancia dos concellos e da política municipal, non conectou coas cidades e abandounou especificamente ao medio rural e aos concellos pequenos”. E, neste senso, pedía o voto para “os candidatos socialistas porque somos a opción natural do progreso para resolver os problemas dos municipios pequenos e do medio rural”.

 

 

O secretario xeral dos socialistas galegos tamén lembraba que estas eleccións municipais coinciden coas europeas, nas que “o PSOE representa a mellor opción de progreso para construír unha Europa da cidadanía, con contidos sociais, dos pobos e que poña á xente por riba dos intereses económicos”.

Pola súa banda, o candidato á alcadía do Barco e actual rexedor, Alfredo García, sinalaba que a candidatura que encabeza preséntase “coa mesma ilusión do primeiro mandato, con moita máis experiencia, con moito máis coñecemento dos problemas e da realidade do Barco e das necesidades dos nosos veciños”. E engadía que “sabemos que hai que seguir, que é o momento da segunda transformación do Barco”, subliñando a importancia do proxecto da circunvalación da vila, cun investimento de “63 millóns de euros, son moitos cartos que van a xerar riqueza, emprego e dinamismo económico aquí durante os próximos 3 anos e iso vainos permitir liberarnos dos camións e facer unha vila aínda moito máis humano”.

Despois de atender aos medios de comunicación na praza do Concello, Caballero, acompañado polo alcalde do Barco e por outros membros da candidatura, iniciaba un reparto informativo de folletos pola vila.

Fotos: Carlos G. Hervella.

 

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close