Os Amigos do Filandón organizaron unha homenaxe ao cantor de Correxais (Vilamartín de Valdeorras) Sebastián López Paradelo que tiña lugar no mediodía do 1 de maio no Complexo Hoteleiro Paladium. Alí celebrábase un xantar na súa honra e no transcurso do acto, o presidente da Real Banda de Gaitas, Xosé Lois Foxo, entregáballe a medalla de Ouro ao homenaxeado, acompañado pola súa muller, Basilisa Trincado Núñez. O evento ao que asistiron numerosas persoas, contou asemade coa lectura de poemas e actuacións musicais.
Segundo as palabras de Foxo, “Sebastián recibiu o maxisterio musical dos cegos que vendían as coplas nas feiras, que coleccionaba e memorizaba con precisión”. O seu repertorio é moi extenso: cantos de seitura, rondas, romances medievais así como outros da Guerra Civil, “pero o que máis cautivou a un servidor foron os cantos de reis que alberga na súa espléndida memoria”, di o director da Real Banda, asegurando que o seu grande patrimonio lírico “pasará a formar parte do Cancioneiro das Terras de Valdeorras que, se a sorte nos deixa, pretendemos publicar”.
Fotos: Carlos G. Hervella