Máscaras e rituais dalgunhas das festas de inverno máis senlleiras da península despregarán o seu engado na fin de semana do 17 e 18 de xaneiro no oriente ourensán. Será un encontro no que participarán folións do oriente ourensán, tanto da zona de Viana como dos veciños concellos de Vilariño de Conso e de Manzaneda. Pero tamén participarán grupos procedentes doutras zonas da provincia e de diferentes puntos de España como é o caso de Asturias ou León e mesmo de Portugal.
Esta mascarada desenvolverase na tarde do 17 de xaneiro en Viana do Bolo e na mañá do 18 de xaneiro en Vilariño de Conso. A organización está a concretar os detalles e tamén a pechar a asistencia dos grupos e moi pronto fará público o cartaz deste evento internacional e que aposta por pór en valor a riqueza destas manifestacións na provincia de Ourense e noutras zonas da península.
A iniciativa está a ser promovida pola Comisión de Entroido 2015 de Viana do Bolo (na que colaboran todos os folións deste municipio) e pola Asociación Xuntos polo Folión de Vilariño de Conso en colaboración cos concellos de Viana e de Vilariño.
Texto: Ángeles Rodríguez