Máis dunha vintena de postos de artesanía medieval e unhas 30 cervexas artesás galegas diferentes. Son dous dos referentes do I Festival da Cervexa Artesá e de Artesanía Medieval que do 18 ao 20 de setembro se celebrará na praza da Mercé de Verín.
Esta cita reúne a oito fabricantes de cervexa artesá: Cervexas Aurium (Ourense), Lendas (Tomiño), Galponbier (Vilanovade Arousa), Bubela (Lugo), Menduiña (Cangas de Morrazo), Vacaloura (Nigrán), Monte Rei (Monterrei) e Chopps (Laza). Ademais entre os postos de artesanía medieval figuran artesáns da comarca de Verín. A isto engándese unha serie de actuacións musicais que ambientarán o recinto. Comezaban o venres co grupo de Allariz “Jenni e Nico” e continuarán o sábado, a partir das oito coa actuación do grupo de Monterrei “Nova Era”.
A entrada ao festival é gratuíta e as cervexas artesás terán un prezo popular de 2 euros a caña. Tamén estarán dispoñibles botellas e packs para a venda. Durante o festival haberá un percorrido cervexeiro no que se lle entregará ao participante unha papeleta con 8 espazos que irá cubrindo cos selos dos 8 fabricantes. Os participantes terán os 3 días para completar a papeleta e, o domingo ás 21:00 horas, realizarase un sorteo entre todos os participantes que achan completado o cartón no que se lle entregarán 8 packs de cervexa, segundo se informa dende a organización, en mans do Concello de Verín e de Adiccag (Asociación para a Divulgación da Cultura da Cervexa Artesá).
Outra das actividades do festival será o curso de elaboración de cervexa artesanal que se impartirá na carpa da cervexa o domingo ás 18:00 horas.