Iago Tabarés: “O BNG é garantía de que se falará da provincia de Ourense e de Galicia en Madrid”

O cabeza de lista do BNG ao Congreso por Ourense participaba nun mitin no Barco xunto a Roberto Quiroga, candidato valdeorrés ao Senado, Suso Vilasánchez e Dolores Rodríguez

Na realidade ourensá actual e naquilo que non se ten feito ata agora pola provincia dende o Estado poñía o foco na súa intervención no Barco o candidato do BNG ao Congreso, Iago Tabarés, na tarde do 17 de abril. “Para os que levamos Ourense e Galicia no corazón é triste ver as estatísticas. Estamos a perder poboación e a maior parte dela na mesma franxa de idade: menores de 35 anos. Isto é algo que afecta ao presente e que condiciona gravemente o futuro. Hoxe temos máis pensionistas que traballadores, e as pensións máis baixas de todo o Estado, un 30% de media máis baixas. E logo está o sistema de privatización dos servizos públicos”, apuntaba.

Malia esta situación, Tabarés aseguraba que “non son pesimista, se estou aquí é porque confío en que a xente de Ourense ten capacidade para saír desta situación”, fronte “aos gobernos do PP e do PSOE, que abandonaron á provincia”, contrapoñía o “voto útil  ao BNG” por varios motivos. “Primeiro, porque é a garantía de que a dereita rancia non vaia gobernar no Estado”, tamén porque “o BNG é garantía dun incremento nas pensións mínimas” e de que “se falará de Galiza e de Ourense en Madrid”, engadía.

O candidato nacionalista ao Congreso dicía ademais que “defenderemos os sectores produtivos e as infraestruturas”, sinalando que o “AVE non cubre todas as necesidades” e aludindo de forma específica á necesidade de mellorar o ferrocarril de cercanías e estradas como a N-120 ou a OU-533. Mencionaba tamén a importancia de poder contar cunha “tarifa eléctrica galega” e poñía en valor a lingua galega, “que é a nosa identidade, o noso patrimonio”, e que ademais “ten unha repercusión no PIB, xera riqueza propia”. Nese senso pedía que a xente vote “pensando en Valdeorras, en Galicia, non pensando noutros territorios, senón pensando por primeira vez en nós”.

 

O candidato nacionalista ao Congreso, durante a súa intervención no Barco./ Foto: Carlos G. Hervella.

 

O discurso de Tabarés pechaba o mitin do BNG no Barco, un acto no que estaba precedido por tres intervencións. A primeira delas era a de María Dolores Rodríguez (número 2 da candidatura nacionalista ás municipais neste concello), quen lembrou que dos 23 deputados que se elixirán en Galicia o vindeiro 28 de abril, 4 serán da provincia de Ourense, incidindo ademais na “probada experiencia política e no demostrado compromiso político coa nosa terra” dos candidatos do BNG.

Deseguido, Suso Vilasánchez, candidato á alcaldía do Barco e responsable comarcal do BNG, resaltaba que “xogámonos moito nestas eleccións” e diferenciaba entre “deputados nados en Galicia” e os que exercen como galegos. “Os do PP e os do PSOE teñen os seus amos espirituais en Madrid e seguen as instrucións que lles mandan, non lles importa Galicia”, comentaba. E resaltaba que “nós pretendemos evitar iso, queremos que Galicia volva ter voz propia, por iso queremos ter en Madrid aos deputados do BNG, que levan a Galicia no corazón e na cabeza”.

En terceiro lugar tomaba a palabra Roberto Quiroga, candidato valdeorrés ao Senado e responsable local do BNG da Rúa, quen cualificaba a campaña das eleccións xerais de “gris”. “Nela” proseguía, “non se fala dos problemas do país, veñen a falarnos de temas que nada teñen que ver con nós, coa nosa realidade, o que me parece dunha irresponsabilidade tremenda”. Para Quiroga o primeiro que se debería facer nesta campaña “é un balance do que fixeron nos últimos anos os que estiveron en Madrid, os cidadáns deberán comparar quen defende ao país e quen se esquece totalmente de nós”.

 

O valdeorrés Roberto Quiroga, candidato ao Senado./ Foto: Carlos G. Hervella.

 

Quiroga citaba os tres obxectivos que teñen en común os candidatos do BNG “traballar, defender a comarca, a provincia e o país e rematar coa corrupción”. E centrábase nas cuestións que seguen estando pendentes en Valdeorras e que “foron esquecidas unha e outra vez por parte dos nosos representantes”. Entre elas incluía un tren de cercanías, “un tren de altas prestacións que nos permita chegar nunha hora a Ourense” e a mellora do “estado da N-120 que está parcheada. Fálase de cando vén a A-76, pero ¿cando se vai arranxar a N-120?”. Para o candidato rues “o BNG é a única forza política que, cando está, con ela están os problemas do país que nos falan da realidade, do día a día. Pido o voto ademais da xente que non é nacionalista porque esas persoas tamén sufren o estado da N-120”.

Fotos: Carlos G. Hervella.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies