ConcellosÚltima hora

Igualdade destina 4,2 millóns de euros para iniciativas nos concellos da provincia

A secretaria xeral de Igualdade, Susana López, informou desta liña de axudas aos responsables das entidades locais

A secretaria xeral de Igualdade, Susana López, e a delegada territorial da Xunta en Ourense, Marisol Díaz, mantiveron unha xuntanza na mañá de hoxe, 23 de xaneiro, cos responsables e persoal técnico dos 92 concellos da provincia para informarlle da nova convocatoria de axudas e subvencións aos concellos para a promoción da igualdade, publicada onte no Diario Oficial de Galicia (DOG).

Segundo explicou Susana López, o obxectivo do departamento que dirixe é o de “apoiar e consolidar as actuacións que se están levando a cabo dende as administracións locais”, concretamente en materia de prevención e eliminación da violencia de xénero, de conciliación así como tamén apoiar a rede de centros de formación ás mulleres (CIM) existentes en Galicia, “integrada por 81 centros dos que 14 pertencen á provincia”, informou López.

Estas axudas contan cun orzamento de máis de 4,2 millóns de euros -cofinanciados nun 80% polo Fondo Social Europeo- e están dirixidas a concellos, consorcios, mancomunidades ou agrupacións de concellos. Ao abeiro da convocatoria anterior destas subvencións, 58 concellos da provincia recibiron un total de 620.000 euros.

Segundo contou a secretaria xeral de Igualdade, a primeira liña das axudas son para a conciliación “para fomentar a corresponsabilidade” entre homes e mulleres. Isto tradúcese tamén na financiación de bancos de tempo co fin de facilitar ás persoas empadroadas nese concello esta conciliación a través dun sistema articulado de intercambio destinado a subministrar servizos e coñecementos entre mulleres e homes. Esta medida conta cun orzamento de 525.000 euros.

A contía máxima que pode recibir unha entidade local local por este programa, dixo Susana López, é de 12.000 euros “no caso de solicitudes individuais” e ata 22.000 euros “se é unha solicitude para xestión compartida ou dunha entidade resultante dunha fusión de varios concellos”.

A segunda liña de axudas está destinada ao programa de prevención e tratamento integral da violencia de xénero, grazas á cal as entidades locais poderán subvencionar accións de intervención orientadas a mellorar a situación das mulleres vítimas da violencia de xénero, dos seus fillos, así como das persoas delas dependentes e actuacións dirixidas á loita contra a explotación sexual, en xeral, e a prostitución en particular. O orzamento para esta liña de axudas é de 352.000 euros, e a contía máxima que poder recibir unha entidade local por este programa é de 10.000 euros no caso da solicitude individual, e de 20.000 euros se é unha solicitude conxunta.

E finalmente, está o programa de apoio aos Centros de Informacións á Muller (CIM), que é a liña de maior dotación, cun orzamento de máis de 3.370.000 euros. A contía máxima que pode recibir unha entidade local por este programa é de 45.000 euros no caso dunha solicitude individual e ata 120.000 euros no caso dunha solicitude conxunta. Na anterior convocatoria, os CIMs da provincia recibiron máis de 485.000 euros. Esta liña de axudas ten como obxectivo de reforzar a funcionalidade dos CIM e consolidar os postos e o perfil profesional das persoas que prestan servizos neles. Así, o Goberno galego subvenciona as prazas para persoal funcionario, laboral fixo ou indefinido para prestar servizos nestes centros de atención a mulleres en situación de vulnerabilidade; e a contratación laboral temporal ou mercantil de profesionais para a prestación dos servizos de asesoramento xurídico ou de atención psicolóxica, así como para levar a cabo as funcións de axentes de igualdade ou de fomento do traballo en rede e de dinamización do territorio con enfoque de xénero.

Fotos: Carlos Asensio.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close