En portadaGalerías de fotosÚltima hora

II Serán da Seitura na igrexa de Manzaneda

No marco deste acto presentánase o libro “Cancioneiro da Seitura Manzaneda e Terras de Trives” de Xosé Lois Foxo

O II “Serán da Seitura Memorial Ludivina Pérez Ricoi” celebrábase na igrexa de Manzaneda hoxe, día 27 de xullo, ás 18:00 horas. Posteriormente, ás 18:30 horas tiña lugar a presentación do libro “Cancioneiro da Seitura Manzaneda e Terras de Trives, de Xosé Lois Foxo, director da Real Banda de Gaitas da Deputación de Ourense.

Nunha igrexa abarrotada, Foxo comezaba recordando a Ludivina, a homenaxeada neste serán. “Este é o resultado dun traballo humilde, é un traballo para salvar do esquecemento a esta cultura”, explicaba. Así, a gaiteira Nadia Vázquez abría as actuacións musicais.

 

 

Entre unha gran ovación, Blandina de Cotarós inaugurou a demostración de cantos de seitura cun dos cales non aparecen no libro, “Requeixo de Manzaneda”. A esta seguiulle Aquilino de Vidueira, o cal normalmente canta coa súa muller, pero nesta ocasión non foi posible.

Xosé Lois Foxo presentaba a Clotilde e Consuelo de Padín como “unhas informantes fantásticas”, para pasar así ao turno dos invitados doutros concellos.

Polo escenario improvisado desta igrexa pasaron Digna e Fiuca de Trives, Jacinta de Lentellais (O Bolo) e a máis especial, Dorinda de Pradolongo (A Veiga), a cal aos seus 98 anos impresionou a todo o público.

 

 

Foxo quixo agradecer todo o apoio e axuda recibida tanto polo Concello de Manzaneda como polo de Trives e sobre todo a todas as persoas que lle abriron as portas neste traballo cuxo obxectivo é o de “dignificar a cultura”.

Os encargados de pechar este acto foron, en primeiro lugar a violinista local María Rodríguez, que recreou o cantar da seitura da señora Ludivina; e un grupo, tamén local, de catro acordeóns.

Unha vez rematado o acto, fíxose unha foto grupal dos colaboradores deste proxecto e tanto Xosé Lois Foxo coma os protagonistas do libro alí presentes firmaron exemplares.

Texto: Alba Prada.
Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close