A terceira edición da andaina “Serra Mosteironda” de Velle, que terá lugar o vindeiro domingo, 29 de outubro, ofrece dúas posibles rutas aos participantes cun percorrido de 18 quilómetros na modalidade da andaina longa, e de 10 quilómetros a andaina curta.
A andaina transcorre na súa maior parte por Velle e esténdese tamén por Villariño, Sabadelle, Tibiás e Canivelos. O presidente da Asociación de Veciños Santa María de Velle, Francisco Sotelo sinalou na presentación de hoxe, 25 de outubro, que este evento “trátase dunha iniciativa que está en crecemento, pois o primeiro ano contamos con 150 participantes e o segundo ano con máis de 250 persoas”. Asemade, explicou que os obxectivos desta andaina son “dinamizar o territorio e dar a coñecer os núcleos de Velle e recuperar os camiños tradicionais que se foron perdendo co tempo”
Pola súa banda, o Deputado de Deportes, Bernardino González, agradeceu á asociación de veciños que leve a cabo esta iniciativa “que pon en valor o noso territorio e fomenta a práctica do deporte e a vida saudable”.
Os interesados en participar poderán anotarse ata o mesmo día da proba ata cubrir as 300 prazas por un custe de 5 euros. Durante o percorrido haberá dous avituallamentos e ao finalizar a proba un aperitivo e sorteos para os participantes. A saída da proba será as 9.30 horas no campo de xogos “O Palao” en Velle, pero os participantes deberán estar media hora antes para entrega de dorsais.