A partires das 22:30h. deste 7 de xullo darase a saída do III Night Trail de Quiroga. Trátase dunha competición nocturna con dous traxectos posibles: un de 21 km (só trail) e outro de 10 km (andaina e trail), nos que será obrigatorio o uso de frontal.
O 80% do trazado discorrerá por pistas e sendeiros, “evitando na medida do posible o asfalto, un percorrido espectacular do val de Quiroga pola noite”, tal e como se destaca dende o Concello de Quiroga, organizador da proba.
A saída darase dende a praza España da vila e o peche da carreira farase catro horas despois do seu inicio. No regulamento deste trail tamén se indica que ao longo do percorrido de 21 km os corredores disporán de “tres postos de avituallamento, un líquido e dous máis, sólido e líquido en metade do percorrido e na chegada a meta”. Na distancia de 10 km os avituallamentos serán dous tanto para camiñantes como para atletas.
Tamén se establecerán controis de paso no decurso do traxecto, “onde os comisarios da organización comprobarán que os participantes levan o material obrigatorio (teléfono móbil aceso, frontal e pilas de recambio), e anotarán o dorsal e o tempo”, citando o regulamento.
