Un total de 65 importadores e distribuidores de viño de 20 países visitaban na tarde do 3 de abril o territorio da D.O. Monterrei para coñecer as especificidades do mesmo, así como os viños tanto brancos como tintos que nel se elaboran.
A visita estivo enmarcada no conxunto de actividades do salón Vinis Terrae que se desenvolveu en Expourense, e foi o propio presidente do C.R.D.O. Monterrei, José Antonio Da Silva, quen recibiu e acompañou á comitiva. Tal como explican dende o Consello Regulador, a primeira parada foi no “viñedo más grande de Galicia, situado no municipio de Vilardevós”. A continuación visitaron a adega Alba Al-Bar S.L., “onde lles amosaron o proceso de elaboración dos viños brancos e tintos”, para rematar a visita cunha cea nun restaurante de Verín con viñoos de Monterrei.
Segundo as palabras do presidente do Consello Regulador, “trátase dunha magnífica iniciativa que permite a importadores e distribuidores de diferentes lugares do mundo coñecer os nosos caldos, xa que proceden de Canadá, EEUU, México, Panamá, Colombia, Brasil, Bélgica e Dinamarca, entre outros países”.
