Unha nova acción vén de realizarse no marco de plan de promoción e apertura de mercados nos Estados Unidos que o Consello Regulador da Denominación de Orixe Ribeiro iniciaba o pasado ano. Un grupo de nove importadores estadounidenses acaba de visitar seis adegas desta D.O.: Alanís, Coto de Gomariz, Pazo de Casanova, Pazo do Mar, Priorato de Razamonde e Viña Costeira.
Esta misión comercial, que remataba o 19 de febreiro, consistía nunha viaxe de profesionais do sector vitivinícola de distintos estados norteamericanos: Colorado, Nova York, Washington D.C., Florida, Georgia ou Illinois. As seis adegas participantes amosábanlles os seus viños a estes profesionais, entre os que había distribuídores e importadores. Tamén se realizaban catas en viñedos e dábanse a coñecer pazos históricos da zona.
“Continuando coa liña marcada no Consello Regulador da D.O. Ribeiro, Estados Unidos é un dos países obxectivo para esta Denominación de Orixe para abrir mercados aos viños das adegas, así como para dar a coñecer a rexión: territorio, historia, gastronomía, tradicións… As seis adegas presentaron os seus viños e amosaron o seu saber aos nove profesionais”, explican dende este consello regulador.