“Celebrarmos o centenario da nacenza de Antón Tovar tráenos espléndida oportunidade para nos asolagar na beleza verbal da súa memorábel obra artística, contribución de calidade ás letras galegas”, di Delfín Caseiro, presidente do Padroado do Museo da Limia (Vilar de Santos), con motivo da inauguración esta mañá da exposición conmemorativa do centenario deste poeta limiao.
Esta exposición poderá ser visitada os sábados e domingos, de 11:30h. a 13:30h. e de 16:30h. a 19:30 h, ata o día 26 de outubro –data na que se cumpren 100 anos do seu nacemento− ubicada na Biblioteca da Limia e na sala Xaquín Lourenzo, consta de exemplares de varias das primeiras edicións dos seus libros, textos inéditos, manuscritos, documentos da vida do autor, os orixinais das ilustracións do primeiro libro, El tren y las cosas, obra de Arturo Baltar, caricaturas e retratos de autores limiaos (Xosé Lois Carreira, Victoria Taboada e Manuel Traveso, Toño Monteiro, entre outros), fotografías e un texto específico do Presidente do Padroado, Delfín Caseiro.
A citada exposición terá un formato dinámico, de xeito que, ao longo dos dous meses de duración iranse ircorporando novos elementos (textos, caricaturas, fotos,…) que enriquezan o contexto expositivo.
Fotos cedidas polo Museo da Limia.
