Os Ecovixiantes de Franciscanas de Ourense continúan inmersos en varios proxectos medioambientais. Dentro do Programa Stars España, esta semana desprazábanse a pé ata o tramo apadriñado do río Loña, no Parque Lonia (preto da desembocadura deste río no Miño, en Ourense), para realizar a inspección de primavera dentro do Plan Proxecta, Proxecto Ríos.
Alí, acompañados polo profesor Gonzalo Sánchez retiraron cinceiros xa deteriorados, depositaron envases lixeiros levados ao colexio na campaña Únete ao Reto, e realizaron unha concienzuda limpeza da zona, retirando lixo como neumáticos ou extintores…
No que respecta ao Proxecto Ríos levaron a cabo a medición de varios parámetros, a través das mostras de auga tomadas, que deron os seguintes resultados: auga case transparente; unha temperatura de 17º C, “non demasiado fría pero que permite soportar a vida acuática con maior facilidade”, explica o profesor; o osíxeno disolto de 6 ppm, “que indica claramente que hai osíxeno suficiente para a maior parte das especies”; acidez da auga de 7,36, “un valor lixeiramente básico (plantas e animais acuáticos viven en intervalo 6/8)”; nitratos de valor 5; e auga moderadamente dura (75-150).
Fotos cedidas.